▍前兩日搭Lift目睹一場小意外，4-5歲細路女唔小心攝咗隻手入去lift門度，阿媽即刻抽返佢隻手出嚟，然後細路女係咁爆喊。
個阿媽係咁同個阿爸講：「死喇，攝咗入Lift口呀，紅晒喇！」
再同個囡講：「紅晒喇紅晒喇！」「係唔係好痛呀？」「唔好喊啦......」
個阿爸直至離開架Lift都冇出過聲，亦冇去查看個囡隻手指嘅傷勢，淨係露出一副「搞L錯你點睇住個囡」嘅責怪表情。
而我，就非常之緊張，我好想同佢哋講，快撚啲去睇醫生啦屌你，啲手指咁樣攝入去，骨折都似！我見到個阿媽係咁捽個囡隻手，我心諗，如果真係骨折你咁樣捽仲大鑊，我好想出聲，叫佢快撚啲帶細路女睇醫生，不過雖然我嘅興趣係找麻煩同埋管閒事，但呢啲始終係人哋屋企嘅事，於是我都係保持沉默。
佢哋離開之後，個細路女嘅喊聲都仲喺我個腦海度迴盪。前幾年陳可辛有套戲叫《武俠》，入面嘅金城武話人體有一個穴道叫膻中穴，係掌管同情心嘅，而佢嘅膻中穴太過發達，所以有時會心軟到唔理性嘅地步。戲裡面金城武用針灸手法刺激膻中穴，用以克制同情心，我喺度諗，如果真係有用，我係唔係都應該試一試呢一招呢？喂！阿偽生，明明唔關你事，你做咩要咁焦慮緊張呢？
唉......呢個問題，我連自己都答唔到自己，而且仲衍生更多嘅問題：
點解啲腦囟都未生埋嘅人要生細路？
點解啲人喺有事時唔係關心咗啲屋企人先，而係責怪身邊嘅伴侶？
點解發生咩事都叫啲細路收聲唔好喊？
點解呢一刻我個腦仲係擺脫唔到呢家人嘅身影？
......
會唔會係我當時唔應該保持沉默呢？
▌哀傷戰記(23)
「膻中穴的錯」
Search